Est 6 | ZomZIV | STEP | Tua zanin kumpipa a ihmu thei kei hi; tua ciangin ama kumpi suahna khangthu bu la-a a sim dingun thu a pia hi.

Esther 6

Mordecai Kipahtawi

1 Tua zanin kumpipa a ihmu thei kei hi; tua ciangin ama kumpi suahna khangthu bu la-a a sim dingun thu a pia hi. 2 Tua lai-ah kumpipa nasem lian kongvang cingte gel - Bigthana le Teresh in Kumpipa Xerxes suamsim ding a sawm uh Mordecai in a genkhiat, a kiciamtehna a mu hi. ^a

3 Kumpipa in, “Hih thu ah Mordecai, bang pahtawina, bang lungdamlahna kipia ahi hiam?” ci-in a dong hi.

Amah cingte in, “Amah bangmah kipia lo hi,” a ci uh hi.

4 Kumpipa in, “Hih huang sungah kua om ahi hiam?” a ci hi. Tua hun laitak, huang pualam pan Mordecai khailup nadinga a phuhsa gui-awk khuampi ah Mordecai khailup nading thu a gen dingin Haman a va tum laitak lian ahi hi.

5 Amah a cingte in, “Huang sungah Haman ding hi,” a ci uh hi.

Kumpipa in, “Hong tumsak un,” ci-in thu a pia hi.

6 Haman a tum ciangin Kumpipa in, “Kumpipa pahtawi nop mipa bangci pahtawi leng hoih ding hiam?” ci-in Haman a dong hi.

Tua laitakin Haman in, “Kumpipa in kei sanga a pahtawi nop zawk kua om peuhmah ding hiam?” ci-in amah dingin a kivawhpah hi. 7 Tua ciangin kumpipa kiangah, “Kumpipa pahtawi noppa, 8 kumpipa silh puantualpi silhsakin, kumpipa tuanna sakol ah tuangin kumpipa lukhu khusak in. 9 Tua ciangin kumpipa ulianpen khat puantualpi le sakol apsak in. Amaute in kumpipa pahtawi noppa puan silhsakin khuapi sung lampite ah sakol tungah tuangsak inla ama mai-ah tangko paisak in. Hih in kumpipa pahtawi noppa kibawl nading ahi hi,” ci-in a dawng hi.

10 Kumpipa in Haman kiangah, “Tu mahmah in pai inla, puantualpi le sakol va la-in, kumpipa kongpi-a tu Mordecai tungah tu-a na ngaihsutna nong gen bangin hih in, “Hoih na saksate khatbeek sit kei in,” ci-in thu a pia hi.

11 Tua ciangin Haman in puantualpi le sakol a la hi. Puantualpi Mordecai silhsak a, sakol tungah tuangsakin khuapi sung kongzingte ah paipihin a mai-ah tangkosaka, “Kumpipa pahtawi noppa hih bangin kibawl hi,” a ci hi. ^b

12 Tua zawh ciangin kumpipa kongpi ah Mordecai a ciah kik hi. Haman ahileh lungsi pipi-in lutunsa in a inn ah ciah vingveng a, 13 a zi Zeresh le a lawmte tungah ama tunga thupiang khempeuh a ko hi. ^c

A thudotte le a zi Zeresh in, “A mai-a na guallelh kipatna pa Mordecai Jew mi taktak ahi nungsang ama langah na pang zo kei ding hi - a sia taktak ding hi ta teh!” a cihuan uh hi. 14 Amaute in amah a hopihpih laitakun kumpipa’ cilgehpa tunga Esther bawlsa pawi sim dingin Haman a paikhia pah hi. ^d